STENBOL - ÎHD û xizmên girtiyan, li Stenbolê, daxwaz kirin ku Delal Tekdemîr demildest bê berdan.

 

Parêzvanên mafên mirovan li Enqere û Stenbolê ji bo balê bikişînin ser rewşa girtiyên nexweş, li hev kom bûn. Di çalakiyan de li ser rewşa girtiyên nexweş Salih Gun û Delal Tekdemîrê hat sekinandin û daxwaza serbestberdana wan hat kirin.

 

Komîsyona Girtîgehan a Şaxa Komeleya Mafên Mirovan (ÎHD) a Stenbolê 714'emîn çalakiya "Rûniştina F" li ber avahiya komeleyê ya li Beyoglûyê li dar xist. Gelek parêzvanên mafên mirovan beşdarî çalakiyê bûn. Di çalakiya vê hefteyê de li ser rewşa girtiya nexweş Delal Tekdemîrê (68) hat sekinandin.

 

Parêzvanên mafên mirovan, wêneyên girtiyên nexweş hilgirtin û pankartên bi nivîsên "Girtiya nexweş Delal Tekdemîrê berdin" û "Tecrîd dikuje, hevgirtin jiyan e" vekirin. Di çalakiyê de gelek caran dirûşmeyên wekî "Girtiyên nexweş berdin", "Delal Tekdemîrê berdin", "Dermankirin maf e, nayê astengkirin" û "Mirov bi mafên xwe mirov in" hatin berzkirin.

 

Metna daxuyaniyê ji aliyê Endamê Komîsyona Girtîgehan a Şaxa ÎHD a Stenbolê Mehmet Acettîn ve hat xwendin. Mehmet Acettîn bal kişand ser 11'emîn Pakêta Darazê û got ku çendî girtiyên nexweş bi mirinê re rû bi rû ne jî rewşa wan di vê pakêta darazê de cih negirtiye.

 

Mehmet Acettîn îşaret bi nexweşînên girtiya nexweş Delal Tekdemîrê ya di Girtîgeha Jinan a Bakirkoyê de kir û got ku guatr, helandina hestiyan bi Delal Tekdemîrê re hene û ligel vê ji ber kirêca di lingên wê de bijîkan gotiye divê demildest bê emeliyatkirin.

 

Mehmet Acettîn da zanîn ku çendî 6 sal û 10 meh û 15 roj cezayê li Delal Tekdemîrê hatiye birin di 23'yê Hezîrana 2025'an de temam bûye jî nayê berdan. Acettîîn xwest ku Delal Tekdemir a astengdar demildest bê berdan û banga hestiyariyê kir.