NAVENDA NÛÇEYAN - Di 21-30’ê Tebaxê de li Sûriyeyê zêdetirî 800 kesayetan ji bo hevdîtina bi Rêberê gelê Kurd Abdullah Ocalan re tevlî kampanyaya ‘Ez dixwazim bi Ocalan re hevdîtinê bikim’ bûne.

 

Kampanyaya ‘Ez dixwazim bi Ocalan re hevdîtinê bikim’ ji aliyê Înîsiyatîfa Azadiya Rêber Abdullah Ocalan a Sûriyeyê û Înîsiyatîfa Parêzeran a Sûriyeyê ya ji bo Parastina Rêber Abdullah Ocalan ve tê birêxistinkirin. Ev kampanya her ku diçe berfireh dibe. Li bajarên Sûriyeyê di 20’ê Tebaxê de dest bi kampanyaya ‘Ez dixwazim bi Ocalan re hevdîtinê bikim’ hate kirin.

 

Bi sedan pêşengên civakê, siyasetmedar, hiqûqnas, akademîsyen, bijîşk, rewşenbîr, serokên eşîr û êlan, çalakvan û oldarên li Herêma Bakur û Rojhilatê Sûriyeyê û herêmên din ên Sûriyeyê (Laziqiyê, Tertûs, Siwêda, Humis, Heleb û Şam) tevlî kampanyayê bûn û daxwaza xwe ya hevdîtina bi Rêberê gelê Kurd Abdullah Ocalan re anîn ziman.

 

Li gorî agahiyên berdevkê Înîsiyatîfa Azadiya Rêberê gelê Kurd Abdullah Ocalan a Sûriyeyê Ferzende Munzur parve kiriye, ji 21-30’ê Tebaxê zêdetirî 800 îmze hatine tomarkirin. Da zanîn ku dê Înîsiyatîfa Azadiya Rêberê gelê Kurd Abdullah Ocalan a Sûriyeyê û Înîsiyatîfa Parêzeran a Sûriyeyê der barê kampanyayê de 1’ê Îlonê (sibe) daxuyaniyê bidin.