Ji Îzmîrê peyama ‘Bijî berxwedana Rojava’ 

2026-01-21 20:18:42


	 

	ÎZMÎR - Li dijî êrîşên li ser Rojava gelek partî û rêxistinên girseyî li Îzmîrê hatin cem hev. Di daxuyaniyê de hat gotin: "Piştgiriya bi gelê Rojava re ne tercîhek e, berpirsyariya mirovahiyê ye." 

	 

	Li Îzmîrê gelek partiyên siyasî û rêxistinên girseyî yên demokratîk êrîşên HTŞ'ê yên li ser Rojava protesto kirin. Girseya gel li ber Îstasyona Trenê ya Elsancakê kom bû.  Gelek caran dirûşmên "Bijî Serok Apo", "Bijî berxwedana YPG", "Kurdistan wê bibe goristana faşîzmê" û "Jin, jiyan, azadî" hatin berzkirin.  Herêma ku daxuyanî lê hate dayîn ji aliyê polîsan ve hat dorpêçkirin. Polîsan girseya ku xwest li ber Navenda Çandê ya Turkan Saylan bimeşe asteng kir. Daxuyanî li ber Qereqola Alsancakê hate dayîn. Metna çapemeniyê ya bi Kurdî ji aliyê Emîne Bozdag ve ya bi Tirkî jî ji aliyê Vezan Karabulut ve hate xwendin.

	 

	Di daxuyaniyê de wiha hat gotin:

	 

	“Cîhan îro di serdemeke dijwar re derbas dibe ku tê de qanûn û mafên mirovan nayên berçavgirtin; ku şer bûye şêweyekî rêveberiyê. Hêzên cîhanî hewl didin ku bi tepeserkirina îradeya gel, kûrkirina şeran û koçberkirina bi mîlyonan kesan ji warê xwe derbas bibin. Zêdetir şer, koçberî û xizanî encama polîtîkayên bi zanebûn in. Rojhilata Navîn ew erdnîgarî ye ku ev polîtîkayên wêranker bi tundî lê têne jiyîn. Şerên ku li herêmê têne kirin êdî ne tenê pevçûnên leşkerî ne; ew pêvajoyek wêrankirinê ye ku berpirsiyariya wan belav bûye, ku bi rêya avahiyên cîhadîst û paramîlîter tê kirin. Gel tên hedefgirtin, avahiyên civakî parçe dibin û sûc nayên dîtin.

	 

	Êrîşên li ser Rojava mînaka herî zelal a vê pêvajoyê ne. Tiştê ku îro li Rojava diqewime ne pevçûnek herêmî ye; ew siyasetek tasfiyeyê ya plansazkirî ye ku li gorî berjewendiyên hêzên navneteweyî û herêmî tê kirin. Gelê Kurd ji ber îradeya xwe ya bêserûber û bêkontrol tê hedefgirtin.

	 

	Rojava mala Kurd, Ereb, Suryanî, Ermenî û Tirkmenan e; Ew ezmûneke jiyaneke azad, wekhev û pir-nasnameyî ye ku bi îradeya hevpar a Elewî, Êzîdî, Xiristiyan û Sunniyan, ku ji aliyê jinan ve tê rêvebirin, hatiye avakirin. Vê modelê nîşan daye ku şer û mezhebperestî ne çarenûsa Rojhilata Navîn e. Tam ji ber vê sedemê ye ku Rojava ne tenê ji aliyê leşkerî ve, lê di heman demê de ji aliyê îdeolojîk ve jî tê hedefgirtin.

	 

	Îro, bi taybetî Kobanî, di bin dorpêça fiîlî de ye. Hêzên HTŞ, bermahiyên DAIŞ’ê, sivîl û deverên niştecihbûnê hedef digirin, hewl didin ku nifûsê bixin bin destê xwe. Dibe ku nav guheribin, lê îdeolojî û pratîkên van avahiyan berdewamiya DAIŞê ne. Tiştê ku li Sûriyeyê diqewime nîşan dide ku avahiyên cîhadîst nehatine ji holê rakirin; ew bi awayên cûda ji nû ve têne bicihkirin.

	 

	Armanca êrîşên li ser Rojava eşkere ye: ji holê rakirina hebûna dîrokî ya gelê Kurd, bê-kurdîzekirina herêmê û ji holê rakirina jiyana pir-nasnameyî. Ev modela civakî, ku azadiya jinan û pêşeroja zarokan dide pêş, ji bo zihniyeta cîhadîst nayê qebûlkirin. Armancgirtina sivîlan û polîtîkayên koçberkirina bi darê zorê bi eşkereyî sûcên li dijî mirovahiyê ne. Têkoşîna gelê Kurd a li dijî DAIŞê ne tenê ji bo xwe, lê ji bo tevahiya mirovahiyê hatiye kirin. Paşguhkirina vê têkoşînê êrîşek li ser nirxên hevpar ên mirovahiyê ye. Polîtîkayên Tirkiyeyê yên li hember Sûriye û Rojava jî beşek ji vê wêrankirinê ne. Destwerdanên leşkerî û siyasî, ku di bin navê ewlehiyê de têne kirin, ne ji bo aştiyê, lê ji bo domandina şer xizmetê dikin.

	 

	Em bang li hemû raya giştî ya demokratîk dikin; Hevgirtina bi gelê Rojava re ne hilbijartinek e, lê berpirsiyariyek li hember mirovahiyê ye. Tiştê ku îro li Rojava diqewime ne pirsgirêkek ewlehiyê ye, lê siyasetek dorpêçkirin û tasfiyeyê ya bi zanebûn e. Berxwedana li ser bingeha îradeya gel bêşikestî ye. Wekî berxwedana Kobaniyê ya 2014’an, îro jî îradeya gel dê bi ser bikeve. Na ji şer re, aştî niha! Bijî wekheviya gelan! Rojava ne bi tenê ye! Bijî aştî!”